Дёмин В. Сюпавчи. Наукасо Д. В. Цыганкин профессоронть эрямозо

Сёрмадомс Дмитрий Васильевич Цыганкиндэ – мельспаро. Те секс, мекс эсь эрямосонзо, тевсэнзэ, обуцясонзо, прянь ветямосонзо сон сонсь канды мельспаро.

Эрси, кузеви ломанесь эрямонь кодамояк тёкшс (лиясто аволь тёкшскак, сех вишка бугорькске пряс), ды – весе: истямо каштанчи сайсы, истя судонзо кепедьсы – ков теть, малазонзояк иля эцне, верде алов карми лангозот ваномо. Ве сон, марят, ансяк сон… Моданть почозо, аволь кияк… Сонсензэ питнезэ, кода видестэ лемдизь эрзятне истят ломантнень, базар чине синдень трёшникак арась. Истятнэнь лангсо Дмитрий Васильевич пейдияк ды… жалияк эйсэст: мезе, марят, теят, бути колевкс мартот… Сонсензэ учёноенть зяро тувталонзо ульнесть кепедемс судонзо – эзизе кепеде,  кадовсь секе Цыганкинэкс, кодамокс ульнесь свал, – Ломанекс. Секс мельспарояк мартонзо вастневемс ды кортнемс. Кидеяк ды мездеяк а пели. Эрьва мезде ули эсензэ мелезэ, конань кисэ ашти алкуксонь эрзякс, назойстэ. Бути несы, ильведевкшни, а визди видькстамс теде: манчевинь, марят, ялгат, мезе теят, эрси… Вечки седейшкава пеедькшнеме. Рудазозо арась. А уш бути раки – раки верьга вайгельть, кургонь келес,  одсто.  Ды якияк истя: од цёракс, эрязасто, прянь кепедезь, теке вармань каршо сэрей виде тумо капши. Бульчом, мень од цёракс? Неень ламо од цёратненень эряви пек маштомс а кадовомс эйстэнзэ, а сасави, кижнэзевить. А уш киштемасо – седеяк. Варчик лисемс каршонзо пелькстамо – изнятанзат! Зяроксть савкшнось некшнемс: од киштицятне умок уш сизесть, пильгень ускозь оймсеме капшить – Цыганкин профессорось яла кишти, од тейтерть-тонавтыцят ды аспиранткат чаравты перьканзо. Секс вечкитькак сеть тердтнемензэ эсест покшчизэст.

Бульчом, мон, некак, аламодо васов  туинь эсень ёвтнемасон. Велявтан эно сенень, мезесь сыремтимимгак таго сёрмадомс Дмитрий Васильевичте. Тувталось истямо. Те шкас яла учёноесь сонсь нолдтнесь книгат. Ней, окойники,  лиссь книга сонсензэ эйстэяк. Лемезэ «Жизнь в науке профессора Д. В. Цыганкина». Те – библиографиянь невтевкс (указатель), ды пурнызе сонзэ профессоронть нуцьказо Г. С. Цыганкин.

Книгась ашти вете кувтасто, конат, эсь ёндо, явнозь зярыянь-зярыянь пелькска.

Васенцесь ёвтни профессоронть эрямонь ды  важодемань кидензэ. Те кись кадык аволь весть сёрмалезь уш  (газетасояк, журналсояк),  ялатеке ловинек эрявиксэкс  куш нурькинестэ максомс сонзэ  одс. Те секс, мекс сон ламос тонавтыця.

Чачсь Дмитрий Васильевич 1925-це иень октябрянь 22-це чистэ Пензань губерниянь Саранскоень уездэнь Мокшалеень волостень (ней Мордовия Республикань Чаунзань райононь) Мокшалей велесэ. Тесэ прядсь сисем класст. Сындест мейле поладызе тонавтнеманзо Покш Маризь велень средней школасо. 1943-це иень мартсто, 17 иесэ цёракаекс, вешевтизе прянзо фронтов. Артиллериянь инструментальной разведкань младшей командирэнь школань прядомадо мейле олякстомтсь Орша, Минск, Борисов, Витебск оштнень. Войнанть прядызе Кёнигсбергсэ. Фронтонь кизэ тешкстазь зярыя медальсэ, юткстост вейкесь – «За отвагу». Кудов велявтсь ансяк 1950-це иень июньстэ ды сеске тусь тонавтнеме Мордовиянь А. И. Полежаев лемсэ пединститутонь историянь-филологиянь факультетэв. Тонавтнесь ды ветясь эрьва кодат вейсэнь тевть, ламо важодсь наукасояк. Секс ниле иень ютазь   факультетэнть прядомадо мейле кучизь   СССР-нь Наукань академиянь Языкознаниянь институтсо аспирантурав.  Тесэ тонавтнесь финнэнь-угрань кельтнень, сёрмадсь Мордовиянь Покш Березникень райононь Чугыр велень кортавкстонть диссертация. Те тевсэнть превс путыцякс ды  лездыцякс ульнесь тензэ содавикс кельсодыесь К. Е. Майтинская. 1958-це иень ноябрясто диссертациясь вадрясто идезель. Те шкантень Дмитрий Васильевич важодсь уш Мордовиянь Н. П. Огарёв лемсэ госуниверситетэнь эрзянь-мокшонь кельтнень кафедрасо. Ушодокшнызе ассистентэкс, диссертациянзо идемадо мейле васня кемекстазель старшей преподавателекс, мейле – доцентэкс.

1962-це иень июлень 19-це чистэ яволявтозель Мордовиянь М. Е. Евсевьев лемсэ госпединститутонть панжомадо, ды Д. В. Цыганкин кучозель тов тонавтнемань ды наукань тевтнень коряс проректорокс. Сонзэ прявтветямонзо коряс од вузсонть теевсть лабораторият, кабинетт, библиотека, кочкавсть тонавтыцят ды тонавтницят… Ды  сентябрянь 1-це чинть институтось вастызе парсте анокстазекс. Тень юткова   Дмитрий Васильевич мукшнось шка важодемс аспирант марто, топавтомс КПСС-нь обкомсо школань отделэнь аволь штатной инструкторонь ды Саранск ошонь Советэнь депутатонь тевть.

1972-це иень июньстэ Д. В. Цыганкин велявтсь университетэв. Сонзэ кочкасызь эрзянь ды мокшонь кельтнень ды литературань кафедрань прявтокс. Сестэ саезь течис ловны тесэ «Эрзянь келень история» ды «Эрзянь келень диалектология» лекциянь курст, «Ономастика» ды «Финнэнь-угрань кельтнень сравнительной морфология» спецкурст, вети курсонь ды дипломонь важодевксэнь сёрмадомат, тонавтнема практикат. 1978-це иестэ Тартунь госуниверситетсэ идесь докторонь диссертация, конань эйсэ ванкшнызе эрзянь кортавкстнэсэ существительнойтнень морфологияст (валонь теевеманть ды валонь полавтневеманть). Лездыцякс тензэ ды превень максыцякс те тевсэнть  ульнесь финнэнь-угрань содавикс учёноесь-кельсодыесь Пауль Алвре. Истя эрзянь келень наукасо кармась улеме эсенек докторонок (мельганзо – профессоронокак) – Мокшалеень цёрась Дмитрий Васильевич Цыганкин. Ютасть кавто иеть, ды сон саинзе эсензэ лангс университетэнь филологиянь факультетэнь мелявкстнэньгак – кочказель те факультетэнь деканокс. 1985-це иень июнень 27-це чистэ ды 1997-це иень июлень 19-це чистэ Д. В. Цыганкин профессоронтень максозельть Мордовской АССР-нь ды Россиянь Федерациянь наукань заслуженной деятелень покш лемтне. Те ней  неть лемтнень питнест алкиньгадсь, сестэ сынст кисэ эрявсь важодемс ды важодемс. Теде башка, учёноесь казезь ламо лия казнесэ. Сон мирэнь-масторонь эрьва кодамо содавикс обществань ды редакциянь  член. Кувать ульнесь тиринь валонь вечкицянь «Вайгель» вейсэндявксонь прявтокс.

Ней Дмитрий Васильевич – эрзянь келень кафедрань профессор. Деканонь ды кафедрань тевтнень кадынзе уш кода комсешка иеть. Ансяк мелявксонзо эзть аламолгадо. Студентэнь тонавтомадо башка, важоди наукань кандидатонь ды докторонь диссертациянь идемань коряс советсэ ды икеле ладсо яла ламо сёрмады. Эсензэ важодевкстнэсэ токши эрзянь  келень весе ёнкстнэнь: фонетиканть, лексиканть, орфографиянть,  морфологиянть ды синтаксисэнть,  истя жо диалектологиянть, историянть, ономастиканть… Тенень кемевтемакс аштить истят важодевксэнзэ, кода «Об особенностях говора с. Мокшалей» (1963), «Свидетельства диалектологии как источник изучения истории мордовского народа» (1965), «Лексические особенности эрзянских говоров» (1966), «Словообразовательная вариантность в диалектах эрзянского литературного языка» (1972), «Некоторые особенности развития эрзянского литературного языка» (1973),  «Грамматические категории имени существительного в диалектах эрзя-мордовского языка (категория падежа и числа)» (1977),  «Грамматические категории имени существительного эрзя-мордовского языка (определённости-неопределённости, притяжательности)» (1978), «Мордовское языкознание за 50 лет» (1980), «Память земли» (1993), «Мордовские языки глазами учёного-лингвиста» (2000), «Память, запечатленная в слове: Словарь географических названий Республики Мордовия» (2005) ды лият.  Теде башка, Д. В. Цыганкин – ламо важодевксэнь редактор ды соавтор. Неть важодевкстнэнь ютксо улить истяткак, конат сюлмавозь аволь ансяк эрзянь келенть ванкшноманзо марто. Сынь токшить финнэнь-угрань весе кельтнень: «Вопросы языкознания» (1971), «Лексикология современных мордовских языков» (1972, 1983), «Очерки сравнительной грамматики мордовских (мокшанского и эрзянского) литературных языков» (1975), «Мокшень кялень нюрьхкяня этимологическяй словарь» (1981), «Ономастика Поволжья» (1986),   «Основные тенденции развития финно-угорских языков» (1985),  «Вопросы лексикологии финно-угорских языков» (1989), «Лингвистический атлас мокшанских и эрзянских говоров» (2002) ды лият. Наукань важодевксэнь пусмонть поладыть-сюпалгавтыть книгатне, конат   алтазь республикань эрзянь школатнень ды вузонь национальной отделениятнень туртов. Веенстнэнь профессорось тагояк сёрмадынзе сонсь, омбонстнэнь анокстынзе  учёной ялганзо марто, колмонстнэ лиссть прявтветямонзо коряс: «Практикум по синтаксису современных мордовских языков» (1971), «Эрзянь кель. Грамматика ды стилистика. 6-це класснэнь тонавтнема книга» (1973), «Эрзянь келень нурькине этимологической словарь» (1977), «Фонетика мордовских диалектов» (1979), «Грамматика мордовских языков: Фонетика, графика, орфография, морфология» (1980), «Эрзянь кель: Грамматика ды стилистика: 8-це класснэнь» (1980, 1985), «Эрзянь кель: 4 класснэнь тонавтнема книга» (1980),  «Фонетика мордовских (мокшанского и эрзянского) литературных языков» (1984), «Грамматикань ды стилистикань коряс учебной пособия (школасо тонавтницятнень туртов)» (1984),  «Занимательной грамматика: Эрзянь школанень пособия» (1988), «Эрзянь кель. Фонетика ды лексика» (1989), «Занимательная грамматика эрзянского языка» (1999), «Эрзянь кель. Морфология» (2000), «Эрзянь кель. Морфема, валонь теевема, морфология» (2000),  «Эрзянь кель. Фонетика, лексика ды валонь теевема. 5-це класснэнь» (2004),  «Русский язык. Занимательная грамматика» (2004), «Морфемика и словообразование» (2006) ды лият. Теде башка, профессоронть наукань сёрмадовксонь паргосонзо 250 ламо статьят.

Сехте содавикстнэ максозь  книгань омбоце  кувтасонть, конань лемезэ «Работы Д. В. Цыганкина в крупнейших библиотеках мира». Сонзэ пурныцянть кемевтеманзо коряс, информациянь од технологиятнень вельде эрзянь учёноенть важодевксэнзэ мусыть ней мирэнь-масторонь 119 библиотекатнень электрононь каталогстост.

Книгань колмоце кувтась – «Работы Д. В. Цыганкина в отечественной и зарубежной историографии» – пачти: неть важодевкстнэ а кадновить истяк аштекшнеме. Течис ловозь сынст эйс 490 пшкалемат. Ды тейнить тень аволь ансяк эсенек, эрзянь ды мокшонь, учёнойтне, лия раськень кельсодыйтнеяк. Сынь ламонень лездасть ды нейгак лездыть наукань статьянь ды монографиянь сёрмадомсто. Книгасонть максозь весе неть важодевкстнэнь ды сынст автортнэнь лемест.

Нилеце кувтась – те Д. В. Цыганкинэнь библиографиязо. Тесэ максозь учёноенть весе монографиянзо, статьянзо, школань ды вузонь тонавтнемапелензэ ды программанзо, эйстэнзэ сёрмадовкстнэ, важодевксэнзэ лангс рецензиятне, сонсензэ рецензиятне (лиятнень сёрмадовксост лангс), книгатне, конатнень редакторокс ульнесь, газетань статьянзо, интервьюнзо. Те алкуксонь сюпавчи!

Профессоронть ламо лия сюпавчинзэ, кода карматано содамо книгань меельце кувтастонть («Архив»), ванстовить Мордовия Республиканть од историянзо документациянь куншкакуросонть (центрасонть).  Ней тосо зярс 291 тев, конатнестэ теезь «Цыганкин, Дмитрий Васильевич…» 6195 № фондось. Кувтасонть ёвтазь весе тевтнень лемест. Книгань пурныцянть кемевтеманзо коряс, сынь яла кармить ламолгадомо.

Книгань эрьва кувтась мазылгавтозь-сюпалгавтозь  эрьва кодамо фотографиясо. Сыненст поладксокс максозь Дмитрий Васильевичень казнензэ, конатнесэ тешкстазь наукас сонзэ покштояк покш путовксозо. Учёноенть вадрясто содазь, минь а кавтолдтано: сон, те путовксось, ёвтазенть лангс а прядови,  яла карми касомо ды ламолгадомо. Лисни, кармить улеме те книганть од нолдавксткак.

Опубликована в журнале «Сятко». 2012. № 9.

 

Оставить комментарий