Дёмин В. Аволь ансяк кельсодыйтнень туртов… Д. В. Цыганкинэнь од книгадонзо вал

«Сятко» журналонь 2011-це иень 9-це номерсэ минь ёвтнинек Д. В. Цыганкин профессордонть книгадо, конань нолдызе содавикс учёноенть нуцьказо Г. С. Цыганкин. Лемезэ «Жизнь в науке профессора Д. В. Цыганкина». Эсенек сёрмадовксонть прядомсто ёвтынек кемема: те книганть кармить улеме од нолдавксонзо. Те секс, мекс содасынек важодеме Дмитрий Васильевичень вечкеманзо. Сон ве чияк, ловт, а ютавты апак сёрмадо.

Ды алкукскак: эль кенеринек неть валтнэнь ёвтамо, кода Дмитрий Васильевич бендявтсь икеленек эсензэ од книга: «Мордовские языки глазами лингвиста-финноугроведа».  Сэнь ланго, мазый, ды лангаксонть ало снимкасонть мазый сонсь профессороськак. Книганть теизь учёноенть статьянзо, конат сёрмадозь меельце кемень иетнень перть эрзянь ды рузонь кельтнесэ.

Важодевксэсь ашти колмо кувтасто: «Лингвистика», «Топонимика» ды «Заметки, рецензии и оппонирование диссертаций».

Васенце кувтась алтазь специалисттнэнень-кельсодыйтненень, сон седе пек чарькодеви сыненст, секс а карматано лангозонзо куватьс лотксеме. Ялатеке тесэяк улить сёрмадовкст, конат чарькодевить весенень, паро мельсэ ловновить. Васняяк, те, нама, «Свидетельства диалектологии как источник изучения истории мордовского народа» статьясь. Сонзэ эйсэ профессорось чарькодевиксстэ ёвтни Сурачирень эрзянь кортавкстнэнь чачомадост, эйсэст мокшоньнь кельстэ саевксэнь вастневемань тувталтнэде, раськень эрямопингенть  марто келень эрямопингенть сюлмавомадонзо, рузонь кой-кона кортавкстнэнь теемантень эрзянь ды мокшонь кельтнень путовкстост ды ламо лиядояк. Эли, мертяно, кода а ловномс теке кувтастонть зярыя лия сёрмадовкстнэньгак? Уш сынсест лемтне сыремтить тень тееме меленть: «О некоторых этимологически общих мордовско-хантыйских языковых особенностях», «Об общих древних корнях в мордовских и хантыйском языках (опыт сравнительного анализа)», «Мокшонь, эрзянь ды саамонь кельтнесэ ве шкань вейсэнь  валтнэнь структурань коряс ёнксост», «Язык – богатство народа (о говорах эрзянского языка Дубёнского района)».

Аволь аламо мельстуиця ды ловновиця  муят «Топонимика» кувтастонтькак. Ловнат тезэнь пурназь сёрмадовкстнэнь ды теке ютат эсь раськенть пингеванзо, кармат содамо, кода ды мезень кувалма теевсь те эли тона тарка лемесь, вастоват финнэнь-угрань ламо топонимтнень малавиксчист марто… Арсетяно, эрьва ловныцясь муи тестэ эстензэ мезеяк мелень явовтыця. Минь, эсь ёндо, макссынек тенк кой-кона сёрмадовкстнэнь лемест. Мейле тынь уш тынсь кочкадо юткстост мезе тенк эряви. Вана эйстэст зярыятне: «Топонимическая система мордовских языков», «Память, запечатленная в географических названиях», «Из наблюдений над структурными особенностями топонимов на территории Республики  Мордовия», «Мордовская микротопонимия (семантико-лексический и словообразовательный анализ)», «Мордовская архаическая лексика в топонимии Мордовии», «Топонимы в словообразовательной системе мордовских языков», «Ойконимы мордовского Заволжья». Бульчом,  шкань  ёмавтнемакс а ули кувтанть педе-пес ловномазояк.  Ловнокшныде эйкакшпингестэ ёвкст? Кемимизь уш: Д. В. Цыганкинэнь топонимиканть марто содавиксэкс теевемась канды а седе вишкине мельспаро.

Книгань колмоце кувтась седе пек кармавты домкасто арсеме. Те секс, мекс вельть уш талновтыця кевкстемат кепеди эйсэнзэ учёноесь. Сынь сюлмавозь эрзянь ды мокшонь раськетнень уцяскаст марто, кадовомс-арась тенст мастор лангс. Сех пшти тень коряс «О некоторых факторах, способствующих сужению языкового пространства мокшанского и эрзянского языков как государственных» статьясь. Сонзэ эйсэ Д. В. Цыганкин профессорось видьстэ ёвты тувталтнэнь, конатнень кувалма минек кельтне теевсть  аволь валдо горницясо – кардаз удало эрицякс, раськенек пачкодсть ёмамо лангс. Учёноесь сёрмады: «Келесь – те се, мезенть кисэ эряви каштангалемс. Эсь кувака пингест перть эрзятне ды мокшотне ламо мезе печтясть. Ялатеке сынь эзизь ёмавто зярс эсь келест, ванстызь пряст этносокс, неень читнес пачтизь лия ёнов а молиця культураст. Тень пингстэ эрзятне ды мокшотне аволь аламо ёмавтсть, мезенть оштё паро ладсо эзинек чарькоде… Ды ней кавонест раськетне таго киулосот – улемс а улемс тенст эрьва кодамо раськень пусмосонть эсь сюпав ды мазый келест марто. Неть кельтнень ёмамодо пелемась пек покш…».

Тень кувалма васенце тувталонть профессорось сюлми сеть кажотнень-стакачитнень марто, конатнень печтить течи эрзянь ды мокшонь велетне. Седе ламотнесэ тейнемс а мезть,  конат эрицятне зярс эзизь кая пряст симемас, кадныть эйсэст, тукшныть паро эрямо мельга республиканть томбалев, школатне пекстневить. Ды те сестэ, зярдо самай велесь кирдсь те шкас минек раськетнень эйсэ. Секс велетнень ёмамось пачти эрзятнень ды мокшотнекнь кода этностнэнь (Н. Ф. Мокшинэнь валонзо коряс, субэтностнэнь) ёмамонтень.

Омбоце тувталокс Д. В. Цыганкин профессорось лови урбанизациянть. Эсест велест каднозь, эрзянь ды мокшонь ломантне ламолгавтыть ошонь эрицятнень, полавтнить чачома келест рузонь келенть лангс. А уш эйкакшост овсе тейневить  цикань ломанекс: тетяст-аваст келенть тонавтнемс тенст а косо, а эсенек школат, а эйдень кужот ошсо арасть.

Бульчом, теке  мазысь, ловт, велесэяк. Д. В. Цыганкинэнь валонзо коряс,  эрзянь эли мокшонь школакс эряви ловомс ансяк сень, косо вететеде-котодо ламо предметтнэ ветявить минек кельтнесэ. Мордовия Республикань вейкеяк школасо те арась. 3–4-це класстнэстэ саезь весе предметтнэ ветявить эйсэст рузонь кельсэ. А школасо, а колледжсэ, а вузсо эрзянь ды мокшонь кельтне тонавтнема келекс эзть тееве, бути а ловомс университетэнь ды пединститутонь национальной отделениятнень. А уш диаспоратнеде кортамскак а мезть. Весемесь тееви сень туртов, эрзянь ды мокшонь од ломантне стувтовлизь эсь раськень келенть ды культуранть, кода седе бойксто човорявольть рузонь кельсэ кортыцятнень ды арсицятнень юткс. Ды тень Д. В. Цыганкин профессорось лови колмоце тувталокс, мекс эрзятнень марто мокшотне яла аламолгадыть.

Нилеце тувталось, сонзэ койсэ, – минек кельтнень (лисни, раськетненьгак) стака уцяскаст кисэ властень кирдийтнень пельде а кевкстнемась. Тень а теить а тетятне-аватне, а башка ломантне ды куротне-вейсэндявкстнэ,  ды васняяк – эрзянь-мокшонь раськень   движениянь исполкомось. Лиякс меремс, эрзянь ды мокшонь кельтнесэ кортыцятнень праваст Мордовия Республикасо кияк ды кодаяк а вансты. Неть кельтнеде законось а важоди. Сон а кармавты Мордовия Республикасо государствань учреждениятнень пшкалемс минек кельтненень рузонь келенть марто вейкетьстэ, ветямс эйсэст тевть, парламентэнь пелькстамот, кортамс судсо, телерадиопередачасо, сёрмалемс эрявикс конёвт  ды истя седе тов. Кодаткак кардамот тень коряс илязт уле. Минек республикасо государствань колмо кельть,  колмонест якасткак эзганзо. Вейкетьстэ. Вейке-вейкень апак лепштя ды апак покорда.

Ветеце тувталось, кода сёрмады книгасонзо Д. В. Цыганкин, – эрзятнень ды мокшотнень ассимиляциясь. Сынь а цидярдыть  рузокс  кортыцятнень каршо, конатнеде, нама, корязост седе ламо, секс ёмавтнесысь аволь ансяк эсь келест, национальной обуцяст марто чачосткак. Тенень «лезды»  истя жо аволь куцясо эрямост, обществань эрямонть чирес келест шаштомась-потавтомась. Секс эсензэ книгасонть эрзянь учёноесь терди властень кирдийтнень путомс тенень пе, лездамс эрзятнень марто мокшотненень ванстомс мазыйдеяк мазый келест ды культураст, школасто саезь вузс молемс ладямс ды ветямс тонавтомаст тиринь кельсэ. Ёмавтомс неть кельтнень – те ёмавтомс сынст эйсэ кортыцятненьгак, мезесь карми улеме авитевикс кажокс.

Д. В. Цыганкин видьстэ яволявты: бути минь зярс оштё эзинек ёма кода раськеть, пельэрзякс ды пельмокшокс теевинек уш. Эйсэнек сэвезь сэви нигилизмань ормась. Седеяк пек – властень структуратнесэ важодицятнень. Кортатано ки соды кодамо кельсэ, литературань келень нормат теке арастькак. Ды тень теить аволь ансяк истяк ломантне, писательтнень марто учёнойтнеяк. Ды сехте берянесь се, мекс пек ламо эрзятненень ды мокшотненень тунь а талновты, мезе карми улеме тиринь келест ды культураст марто. Ды те оштё вейке тувтал, мекс минь чалгинек масторлангсто  ёмамонь кинть лангс.

Сисемеце тувталокс профессорось лови эрзятнень ды мокшотнень пек васолга, панксонь панкс сравтневемаст. 2005-це иень ловоматнень коряс, эйстэнек ульнесть весемезэ 845 тёжат, конатнестэ малав эрьва колмоцесь (283,8 тёжа) эрясь Мордовиясо, лиятне  (пельмиллиондо ламо) Россиянь келес. Виде, седе покш пельксэсь ойсесь Равчирева ды Уралчирева. Ды вейкеяк таркасо весе эрицятнестэ эрзятнеде ды мокшотнеде арасть 20 проценттэ ламо. Лиякс меремс, сынь тосо национальной меньшинстватнень кондят, ансяк истямокс а лововить. Те секс, мекс, марят, ули эсест масторпурнавксост (государственностест). Ансяк мень те масторпурнавкс сынст туртов? Сонзэ гражданинэкс сынь а лововить, праваст тесэ вешемс мезеяк властенть пельде кодаткак арасть, сонсензэ республиканть жо арасть сатышка виензэ мейсэяк лездамс тенст. Ды те сестэ, зярдо самай весе эрзятнень ды мокшотнень вешемаст топавтоманть туртов сон теезель таго-зярдо. «Видьтэ мертяно, – сёрмады Д. В. Цыганкин, – историясь тейсь пек авадрясто  малавикс кельсэ кортыця кавто покш раськетнень марто, мезенть ней уш а витьсак. Кода лездамс тевентень? Васняяк, республикантень эряви саемс эсензэ лангс Россиянь келес эриця эрзятнеде ды мокшотнеде мелявксонть, теемс сынст туртов национально-культурной автономият, культурань-тонавтомань программат. Ярмактнень неть программатнень  топавтомс явовольть  Московось эли ёвтазь автономиятнень марто регионтнэ. Те улезэ кемекстазь Россиянь Федерациянь субъекттнэнь марто договортнэсэ».

Кавксоце тувталокс, кона канды эрзятнень ды мокшотнень туртов зыян, профессорось ёвты  сынст кельтнень статустост мекев-васов чаво кортамотнень, литературань вейкине келень теемадо мельтнень-арсематнень. Невтемань кисэ сон максы «Мордва» книгасто Н. Ф. Мокшин профессоронть валонзо: «…Кода сеть иетнестэ, истя нейгак те кись (литературань кавто – эрзянь ды мокшонь –  келень теемантень) эзь ловово ды а лововияк педе-пес видекс. Аволь ансяк ламо учёнойтне, обществань ламо деятельтнеяк вадрясто чарькодсть ды чарькодить: педе-педсек сонзэ топавтомась канды зыян аволь ансяк эрзянь-мокшонь раськенть вейсэндямонть, государствань строительстванть туртовгак, кирдьсынзе эрзятнень ды мокшотнень вейсэндявомаст, виевгавтсынзе явовомаст, мезенть авадря цётавкстнэ, васняяк, сынсест эрзятнень ды мокшотнень туртов, икелепелев а содавить». Неть валтнэнь каршо Д. В. Цыганкин профессорось, эсь ёжомарямонзо апак кекше, яволявты: «Вай, кода тустомты артовкстнэнь мельспутовикс профессорось! Ансяк а карми улеме истя, кода Тынь арсетядо. Эрзянь ды мокшонь раськетне, эрьвась эсь келензэ марто, кода башка этност  сюлмавсть-вейсэндявсть истя, кода те эрявсь историянтень… Питнейдеяк питней сюпавчикс сон кадсь тенек кавто малавикс кельть –  эрзянь ды мокшонь.   Ды вейкеяк ломанентень, учёноень-лингвистэнь, этнографонь, историянь вейкеяк коллективентень… а удалы вейсэндямс сынст вейке кельс, теемс юрсост мезе-бути истямо, конатань эрзятне ды мокшотне  лововлизь эсестэкс».

Эрзятнень ды мокшотнень кезэрень уцяскасост историянь-культурань явовкстнэ ды кавонест раськетнень   мельсэст-арсемасост неть явовкстнэнь невтематне кемекставсть карадо-каршо аштиця «мокша» ды «эрзя», «мокшанский» ды «эрзянский» лемтнесэ. Те кемекстамось яволявтсь эсь прядонзо оштё VI пингенть прядовомсто – VII пингенть ушодовомсто, мезде пачтить се шкань кедьсёрмадовкстнэ. Мордовиянь культурань, историянь, этнографиянь ды кельтнень кой-кона тонавтницятне бажить сыремтемс кавтолдомат «мокшонь кортавкс» ды «эрзянь кортавкс» лемтнень коряс, истят кортавкст, марят, арасть, ули вейке, «мордовской»… Ды те сестэ, сёрмады седе тов Д. В. Цыганкин, зярдо а мокшотне, а эрзятне а мордвакс, а мордвинэкс пряст а ловить, истят валт тиринь кельсэст арастькак. Ды те алкукс истя. Бульчом, теде оштё ХIII пингестэ сёрмадсь рузонь учёноесь Георги, кона ютась сестэ Равчирева. Сонзэ валонзо коряс, мордвинэсь лемди прянзо мокшокс эли эрзякс, мордвакс лемдить эйсэст рузтнэ. Эсест сёрмадовкссост тенень кемевтить рузонь  лия содавикс учёнойтнеяк – П. С. Паллас, А. А. Шахматов… Мордва этнонимесь  а вастневи эрзянь ды мокшонь фольклорсояк.

Явовты мель  Д. В. Цыганкин профессоронь статьянть пезэяк. Сон кодамо виев, истямо видеяк. Ученоесь келейгавтызе саезь кортамонть, лиссь сонзэ томбалев, ды те седеяк кастызе сёрмадовксонть гайгеманзо. Вана сон, те песь. Аволь ансяк, марят, эрзянь ды мокшоонь кельтнень, «Россиянь финнэнь-угрань весе кельтнень коряс государствань келень политикасонть неявить тамашань тевть. Ве ёндо, неть кельтне сельме икеле потавтовить (арасть финнэнь-угрань кельтнесэ тонавтома школат, алкуксонь теле- радиоканалт, региононь (райононь) свал лисниця газетат, кельтне явозь вузтнэнь эрямост эйстэ ды истя седе тов), лия ёндо – кой-кода кирдевить (аламошка ярмаксояк) тонавтомась, культурась.

Нама, моротне, фестивальтне, концерттнэ, фольклоронь праздниктне, косо кайсетить эрзянь ды мокшонь кельтне, эрявить раськень ойменть кирдеманзо кисэ. Ансяк неть кельтнень кода национальной культурань юронть апак вансто ды вандынь чидест апак мелявто, пачкодтяно пек покш кажос – кавонест раськетнень, мокшотнень ды эрзятнень, ёмамонтень. Фольклоризациясь а ванстасынзе эрзянь ды мокшонь кельтнень, мартост вейсэ – сынст кандыця этностнэньгак».

Истят те статьясонть Д. В. Цыганкин мелензэ-арсеманзо.  Сынест паро поладксокс кармась улеме «Некоторые размышления о значимости родных эрзянского и мокшанского языков  в школьной практике» сёрмадовксось. Теде башка, теке кувтасонть профессорось вети кортамо А. Доронинэнь «Баягань сулейть» романонть кельдензэ-валдонзо, эйсэнзэ сельме валонть вастневемадонзо, Хейкки Паасоненэнь «Мордовский словарь» важодевкстэнть, финнэнь-угрань келень наукантень П. Аристэ, К. Е. Майтинская, А. П. Феоктистов учёнойтнень покш путовкстост.

Ды лиссь весеме ёндо эрявикс, питней ды мельспаросо ловновиця книга.

Неть валтнэ ладить сонзэ колмоце пельксэнтеньгак, конань аволь умок нолдызе Н. П. Огарёв лемсэ МГУ-нь издательствась. Сонзэ эйсэ Д. В. Цыганкин профессорось поладызе эрзянь ды мокшонь кельтнень эрямопингедест ды уцяскадост пек эрявикс кортамонзо. Ды – тагояк! – аволь ансяк теде. Учёноесь, кода теке лемсэ икелень кавто книгасонзояк, лингвистикань кевкстематненень васенце меленть явозь, лисни сынст томбалевгак. Ды тень кувалма пусмось витьсы-топавтсы аволь ансяк кельсодыйтнень, истяк ловныцятнень мелесткак. Седеяк пек топавтсынзе секс, мекс, кода свалгак, натой сехте стакадонть учёноесь бажи ёвтнемс-сёрмадомс чарькодевикс кельсэ, теке вузонь тонавтома нупальсэ студентэнстэнь. Тень кувалма мик ванькс лингвистикань ламо таркатне ловновить теке а содавикстэ мельстуиця ёвтнема. Тенень кемезеват уш васенце сёрмадовксонть ловномсто, конасонть панжови книгань ушодыця «Лингвистика» кувтась. Сонзэ лемезэ «Краткий очерк о мордовских языках». Сонзэ эйсэ учёноесь эскелькс мельга эскелькс юты эрзянь ды мокшонь кельтнень эрямопингеваст сех васоло шкатнестэ саезь.

Опубликована в журнале «Сятко». 2012. № 2.

 

Оставить комментарий