2014 – це иень февралень 13-це чи газетадонть!

Эсь мелень ёвтамо

 

Прявт сёрмадовксонть «Сывелень ды ловсонь нолдамось…» (Т. Аксенова).

Эйсэнзэ:

1) арась лоткстема тешксэсь истямо валрисьмесэ: …участникне ванокшнызь выставканть, конань анокстызь партиянь местной отделениятне ды эйсэнзэ бажасть невтемс… (эряволь ды валсюлмавксонть икеле путомс эрявикс тешксэсь);

2) а теи парокс сёрмадовксонть пек ламоксть «партийной организация» валсюлмавксонть вастневемазо (сисемшка таркасо); лиясто сынь аштить шабрацек: «Тень эйсэ, нама, покш таликаст партийной организациятнень. Кенярдовты партийной организациятнесэ пек ламо од ломантнеде…»;

3) а зяроксть ловныцянть сельмс каяви партия валось! Мезекс пек ламось? Содави, неень шкасто икелев ветиця партия арась!;

4) кодаяк а чарькодеви «ды истя седе тов» валсюлмавкстнэнь смустест. Ловнотано: «Весемезэ пуромкшность партиянь 800 ламо члент, депутатт, республикань министерствань ды ведомствань прявтт ды истя седе тов». Таго ловнотано: «Кевкстематне сюлмавозельть таркатнесэ партиянь важодеманть, велетнесэ китнень, культурань, спортонь объекттнэнь стявтоманть марто ды истя седе тов» (а мезекс лотксема тешксесь важодеманть форманть мельга).

«Мордовиянь брендэнть…» (М. Девятова)

1) арась эрявикс лотксема тешксэсь истямо валрисьмесэ: «…ливти Мордовия Республикань лементь ды максови аволь ансяк мазычинь кисэ» (ды сюлмиця валонть икеле эряволь путомс содавикс тешксэсь);

2) стилень асатыксэсь: «…директорось С. Ю. Иванов ёвтнизе эсь заводонь ашожда историянзо ды ёвтась сюкпря»;

3) сёрмадовсось аволь покш, теке марто эйсэнзэ коряс валось вастневи котоксть-сисемксть: «решениянзо коряс», «качествань коряс», «путомань коряс», «маркетингень коряс» ды седе тов.

 

«МФЦ-тне правительстванть вановтонзо ало»

Тесэяк:

1) козо эряви, а путови лоткстема тешксэсь. Ловнотано: «…”вейке вальманть” принципенть коряс кармить максовомо государственной ды муниципальной услугатне ды истяжо улить МФЦ-нь теемань схематне» (эряволь путомс ды сюлмиця валонть икеле эрявикс тешксэсь);

2) аволь пек покш сёрмадовксось, а ловныцянть сельмс нилексть-ветексть каяви эште валось. Лиясто сынь аштить шабрацек. Ловнотано: «Бути жо кармить эрявомо эште, тень туртов таркат улить тевстематне зярс эште улить». Бути валсюлмавксоськак эряволь полавтомс. Монь койсэ, эряволь истя: «Карминдяряйть эрявомо, таркат улить».

 

«Уроз эйкакштнэ учить лезкс» (В. Юдина)

 

Стилень ёндо ванозь, сёрмадовксось «аварди»:

1) авторось пек вечки коряс валмельгаксонть. Сонзэ аравтомазо неяви комсешка таркава: «тень коряс», «конань коряс», «конатнень коряс», «кевкстемань коряс», «валонзо коряс», «договоронь коряс». Апак стувто эште валоськак. Лиясто сон путови шабрацек: «…максозельть эште 2536,8 тёжат целковойть, конатнень вельде эште колмо урозтнэнень явсть эрямо таркат»;

2) койсэнь, а эряволь совавтомс сёрмадовксонтень сумма (те суммась саты …), штобу (штобу эйкакшонь кудотнесэ…) валтнэ. Сынь полавтовить эрзянь валсояк.

«Кода ванстомс ды виевгавтомс…» (В. Юдина)

 

А беряньстэ сёрмадозь текстэсь:

1) теке марто ловныцянть сельмензэ икеле киштезь кишти коряс валось. Сонзэ минь мусынек 17-ксть (политикань коряс, келень коряс, вановтонзо коряс, конатнень коряс, эйкакштнень коряс, кевкстемаст коряс ды седе тов);

2) штобу, бути сюлмиця валтнэдэ…

Сынтеместкак эрзякс тееви валрисьмесь. Ловнотано: «Текенень бу поладовлинь, бути эрзянь, мокшонь тетятне-аватне кармить тонавтомо…». Седе малавиксэкс эрзятненень улевель истя: «Карминьдеряйть тетятне-аватне тонавтомо эйкакшост тирень кельсэ кортамо…»;

3) апак яво кадовсть обстоятельстватне-деепричастиятне (ськамост эли кандовиця вал марто). Ловнотано: «Се шкастонть саезь ламо теезь…» (эряволь саезь форманть мельга путомс эрявикс тешкс). Тесэ жо: «Кемень иеде икеле кемекстазь Минобразованиянь…» (эряволь кемекстазь валонть форманть мельга путомс эрявикс тешкс).

«Эсь тевень ушодомсто…»

 

Сёрмадозь а беряньстэ. Ловнови шождасто. Теке марто:

1) улит нолдавкст, сельмс каявицят. А явовить эрявикс тешкссэ деепричастиятне. Ловнотано: «Кемготово иень ютазь…» (Эряволь ютазь валонть форманть мельга путомс эрявикс тешкс). Седе тов: «Иень ютазь Пекка панжсь…» (Эряволь ютазь форманть мельга путомс эрявикс тешкс);

2) арась эрявикс тешкс истямо валрисьмесэнть: «Те тевесь моли ды аволь састыне» (эряволь путомс эрявикс тешкс моли глаголонть мельга).

 

«Алиментэнь апандомась…» (В. Юдина)

 

1) киштезь киштить ловныцянть сельмензэ икеле коряс-тнэ. Эйстэст кавксошка. Ламо. Статьясь апокш;

2) колмоксть совавтовить тевс нолдазель, колмоксть топавтовсть;

3) пек ламо рузонь валт, конатне стакалгавтыть текстэнть, ды теньсэ а шожда сонзэ ловномс. Сельмс каявить истятне: суммась, исполнительной производстватне, категориянь, мератне, заработказо, бюджетэнь системась, информациянь средстватне, представительтнень туртов ды седе тов;

4) мезекс шабрацек кавто туртов валмельгакстнэ? А чарькодеви.

 

 

 

«Пединститутсо омбо масторонь кельтнень…» (Ю. Еремина)

1) истя, кода лиятнесэ, ламоксть вастневи коряс валмельгаксось (котоксть);

2) апак яво эрявикс тешкссэ деепричастиянь велявксось. Ловнотано: «…прявтонь полавтыцясь Ольга Ружина зярыя иень ютазь минек республикасо…» (эряволь путомс тешкс ютазь валонь форманть мельга);

3) штобу ды можналь тунь а эрявольть совавтомс те сёрмадовксонтень. Сынстеместкак, арсиндерят – тееви валрисьмесь;

4) пек маласо аштить системат, системадонть. Ловнотано: «…лувсо кортавсь вейке истямо системадонть. Тесе ёвтневсь itrainum электронной тонавтомань системадонть. Те системанть лия ёнов а молиця технологиязо…».

«”Надежданть” опытэзэ…» (В. Юдина)

 

1) тесеяк шабрацек аравтовить коряс валмельгавксось. Ловнотано: «… номинациянь коряс, конась ютавтови рузонь православиянь церькованть ушодксонзо коряс…»;

2) а путовить, козо эряви, лотксема тешкстнэ. Ловнотано: «Нама икелепелев арсеви кодамо опытэсь седе пек лади ды эряви лиятнень тонавтнемс» (эряволь путомс эрявикс тешкст арсеви глаголонть мельга ды сюлмиця валонть икеле).

«Олимпиаданть панжомсто…» (В. Синдяев)

 

1) а путовить эрявикс лотксема тешкстнэ. Ловнотано: «…токизе те шаронть ды стадионганть кармасть яксеме ломанть» (эряволь ды валонть икеле путомс эрявикс тешксэсь). Тесэ жо: «…уставасть лисеме национальной оршамопельсэ ломанть ды те пек паро» (арась эрявикс тешксэсь ды валонть икеле). Тесэ жо: «…ютамодонть мейле уставась театрализованной невтемась» (арась эрявикс тешксэсь мейле валонть мельга). Тесе жо: «Шкань ютазь стадиононтень сась Мария Шарапова тенисисткась» (арась эрявикс тешксэсь ютазь валонть мельга);

2) шабрацек путови невтезель глаголось. Ловнотано: «…налксемань эмблемась невтезель мазый фейерверктнень вийсэ. Невтезель “Москва – Красная Поляна” телемостось… косо Андрей Малахов ветицясь невтизе эмблеманть».

«Инновациянь тештинеть» (М. Девятова)

 

Эйсэнзэ:

1) а явовить деепричастиятне. Ловнотано: «Кие соды, паряк, зярыя иень ютазь проекттнэнь…» (арась тешкс ютазь валонть мельга);

2) а явови эрявикс тешкссэ стакалгавтозь (сложной) валрисьмесь. Ловнотано: «Сон карми служамо яжавкстомо вейкешка ие, карми микшневеме спорттоваронь лавкатнесэ ды ули эрявикс велопрокаттнэнь туртов» (арась эрявикс тешксэсь ды валонть икеле);

3) стилень ёндо. Ловнотано: «Те технологиясь карми лезев рекламань вывескань теемстэ, дизайнертнэнь туртов, автомобильтнень вадрялгавтоманть туртов».

«Мезе канды олимпиадась» (Н. Евдокимов)

 

1) тесэяк шабрацек аравтозь сельмс каявиця коряс валмельгаксось. Ловнотано: «Тесэ печатавить статьят, спортонь физической культурань анокстамонь коряс методикат, ветяви спортонь коряс социология»;

2) а мезекс те сёрмадовкссонть эште валось. Ловнотано: «Ломантне эште чарькодьсызь, бути минек сборноесь карми васенцетнень ютксо, бути жо истя а лиси…». Мезекс кавксть бути  союзось. Валрисьмесь тееви сынстеместкак: «…карминдяряй минек сборноесь васенцетнень ютксо, а лисиндеряй а истя, седеяк…»;

3) а путови эрявикс тешксэсь. Ловнотано: «Сон теезь фишт пандонть прясо ды кандтнияк те лементь» (эряволь путомс тешкс ды валонть икеле).

«Од проектэнть кисэ…» (М. Девятова)

 

Аволь покш сёрмадовксось. Теке марто:

1) эйсэнзэ зярыя туртов (ветексть) валось.

2) а чарькодеви, мезекс эште валось истямо валрисьмесэ: «Сетненень, конанень эште эзть топоде 35-иеть…» (сонстемензэяк смустесь а полавтови)

 

«Кой проектэсь …» (Т. Маторкина)

Сёрмадовксось стилень коряс паро. Ловнови шождасто. Теке марто эйсэнзэ улить стилень асатыкст. Васенце:

1) котоксть сти сельме икеле коряс валмельгаксось;

2) шабрацек кой-кона валрисьметнесэ вастневить вейке юронь валтнэ. Ловнотано: «Школанть юрсо важодить эйкакшонь искусствань школа, спортшкола…».

Меельце валось

 

«Эрзянь правда» газетась – эрзякс лисницятнестэ вейкесь, конась канды-сравты тириень келенть ламо таркава, косо эрить-кортыть эрзятне. Теньсэ сонзэ виезэ, эрявиксчизэ. Секскак эрьва сёрмадовксонть – статьянть, очеркенть, ёвтнеманть эряви арсемс-ваномс эрьва ёндо (журналисттнэнень неть ёнкстнэ эрявольть содамс). Алкукскак, а карми вечкевеме ловныцянтень газетась, стиндеряйть сонзэ сельмензэ икеле ламоксть вастневиця коряс (те валось весемезэ газетасонть вастневи 100-ксть), эдь, эште, бути валтнэ. Кодаяк а чарькодеви, мекс газетась вечки примасть участия ды ламо лия рузонь валтнэнь, конатнень смустест (ламотнень) ёвтави эрзянь валсояк.

 

Оставить комментарий