16-це чинь (2013 иень) «Эрзянь правда» газетань лопатнень (страницатнень) лангс Д. В. Цыганкин профессоронть варштавксозо

Ёвтаса, весе газетань лопатнень ловнынь пштистэ; мель явинь васняяк сень лангс, кодат асатыкст улить статьятнесэ (сермадовкстнэсэ).

Сынь истят:

  1. Лотксема тешкстнэнь путомасо; ламотнесэ эрявикс таркасо стакалгавтозь валрисьметнесэ ды сюлмиця валонть икеле а путови лотксема тешксэсь (запятоесь). Саемга:
  • Кода уж тешкстынек, А. Н. Давыдовнень тедеде топодсть 60 иеть ды вана курок, маень 25-це чистэ, сон арси ютавтомс…[1] (ды сюлмиця валонть икеле арась эрявикс лотксема тешксэсь);
  • Сынст ули тейтерькаст Екатерина, конанень 14 иеть ды сонгак тусь, кода мерить, тетянзо киява[2] (ды сюлмиця валонть икеле арась эрявикс лотксема тешксэсь);
  • Технопаркось мелят уж кучнось Россиянь эрьва кодамо пелькстамос ды секскак тензэ явозельть…[3] (ды сюлмиця валонть икеле арась эрявикс лотксема тешксэсь);
  • Ансяк зярыя иес тонавтния те тарканть педе-пес ды те шкас кодаткак берянь тевть арасельть…[4] (ды сюлмиця валонть икеле арась эрявикс лотксема тешксэсь);
  • Сынь совасть «Север» журналонь редколлегиянтень ды неть сермадыцятнень произведениятне седе сеедьстэ…[5] (ды сюлмиця валонть икеле арась эрявикс лотксема тешксэсь);
  • Свал анок лиятненень лездамо ды вакссонзо ёжоткак вадрялгады…[6] (ды сюлмиця валонть икеле арась эрявикс лотксема тешксэсь);
  • Теицятнень эштё улить ламо кевкстемаст ды кудонть перька таркатнеяк эштё апак тее[7] (ды сюлмиця валонть икеле арась эрявикс лотксема тешксэсь);
  • Занятостень центрас эдь пшкадить сеть, кинень алкукс эряви лезкс ды минек специалисттнэ тень коряс теить весементь[8] (ды сюлмиця валонть икеле арась эрявикс лотксема тешксэсь);
  • Ютась пингень 70-це иетнестэ кияк од цёратнестэ эзь арсек армиясо (эряволь армиясто) кекшемеденть ды од цёрась кавто иеть служась…[9] (ды сюлмиця валонть икеле арась эрявикс лотксема тешксэсь);
  • Известняктне-артериятне моданть потсо аштесть прок покш трубат ды сынст пачк шольни эрексиянь ведесь [10] (ды сюлмиця валонть икеле арась эрявикс лотксема тешксэсь);
  1. Вейке теке жо валонть ламоксть вастневемазо. Истямокс неявить: коряс, истя жо, эдь, эште. Саемга, коряс валось газетань лопатнесэ муеви 60-де ламо таркава. Улить истят статьят, конатнесэ коряс валмельгаксось аравтови 9 таркава – «Важодицявтомотненень лезды отяжелень центрась»,
    4-ксть – «Од сёрмадыцянь семинар», 6-сть – «Этнической туризманть виевгавтомга» статьятнесэ.

А содави, мекс газетань журналисттнэ пек вечксызь рузонь кельстэ саезь эште валонть, конась гайгемань-структурань коряс пек явови эрзянь эсензэ валтнэстэ. Газетасонть сон муи тарка (косо а эрявольгак) малав 30-ксть. Кой-кона статьятнесэ (лиятне пек вишкинеть) эште валось вастневи колмоксть-нилексть («Промксонтень сыть 7 академикть»).

А ловновияк, зяро таркава, козо эряви-а эряви аравтови истя жо, эдь валтнэ. Саемга: «Музыкантось – Покш Березник велестэ» сёрмадовкссонть истя жо вастневи 4 таркасо, 3-ксть «Од сёрмадыцянь семинар» статьясонть,
6-ксть («Этнической туризманть виевгавтомга») статьясонть.

А чарькодеви, мекс пек эрявиксэкс ловови газетань страницатнесэ эдь валось. Сонзэ улемазо кой-кона статьятнесэ кодамояк лезэ а канды. Сонстемензэяк арсеманть смустезэ а полавтови. Саемга: Велесэ эдь сынь пек эрявить («Зярдо тевесь вечкеви…») – Велесэ сынь пек эрявить; Эдь сонськак чачсь-кассь велесэ… («Чевте седей, шожда ойме») – Сон сонськак чачсь-кассь велесэ…

  1. Валрисьметнесэ валтнэнь а видестэ аравтомаст. Эрзянь грамматикась (синтаксисэсь) тонавты (веши) сёрмадомс истя:
  • Од путовкссо кецявтсамизь тиринь театрась (газетасонть «Тиринь театрась кецявтсамизь од путовкссо»);
  • Отяжелень центрась лезды важодицявтомотненень (газетасонть «Важодицявтомотненень лезды Отяжелень центрась»)
  • Покш мельспаросо кадовсть Мордовиядонть журналисттнэ (газетасонть «Журналисттнэ Мордовиядонть кадовсть покш мельспаросо»);
  • Жерар Депардье содавикс актёрось (газетасонть «Содавикс актёрось Жерар Депардье»);
  • Е. Н. Пулов – театрань прявтось (газетасонть «Театрань прявтось Е. Н. Пулов»);
  • Н. В. Петрушкин – РФ-нь Федерациянь Советэнь членэсь (газетасонть «РФ-нь Федерациянь Советэнь членэсь Н. В. Петрушкин»). Истят сёрмадовкстнэ вастневить газетань ламо таркава.
  1. Вейке теке жо валонь форманть (валсюлмавксонть) вейке теке жо статьясонть кавксть-колмоксть вастневемазо. Саемга:
  • …Минь нейгак вантано сынст эрямост мельга, а каднотано сынст вановттомо [11] (эряволь – а каднотано вановтомост);
  • Васняяк минь якинек музыкальной школа-интернатонтень… Истяжо минь якинек эрзянь-мокшонь раськень театрантень… Гимназиясонть якинек финнэнь келень урокс…[12]

Истят асатыкстнэде газетасонь пек ламо.

  1. Примить участия, теезь отделка, явить мель тематнень разработкантень, жребий вельде решави, конференциясь мольсь колмо площадкава, весе неть кадегориятнень туртов, примасть тёжадо ламо спортсмент, мотоцикласькак апак регистрирова ды рузонь кельстэ саезь ламо лия а эрявикс валт, конатне допрок а эрявольть совавтомс газетань лопатнес.
  2. Бути, што, штобу союзтнэнь валрисмес аравтомаст. Сынст уликсчист сёрмадовкстнэсэ а ловови ильведексэкс, теке марто стилистикань вешемасо – литературной кельстэнть сынст эрявить шаштомс. Валрисьмесь тееви сынстеместкак. Саемга:
  • «… Сюкпря землячествантень сень кис, што а стувтнесызь Ине Отечественной войнасонть маштовозь эсь ёнксонь воинтнэнь» (…сюкпря землячествантень Ине Отечественной войнасонть маштовозь эсь ёнксонь воинтнэнь а стувтомань кис)[13];
  • «…Вансь, штобу авольть лисе ильведевкст журналистэнь статьятнесэ (…вансь – иляст уле ильведевкст статьятнесэ)[14];
  • «Эйкакштне видькстасть, бути пелькстамось ютаволь рузонь кельсэ, сырнень медальтне…» (Эйкакштне видькстасть, ютындеряволь пелькстамось рузонь кельсэ, сырнень медальтне…)[15];
  • «Лиякс меремс, теезь весемесь, штобу сеске совамс ды эрямс» (Лиякс меремс, теезь весемесь – сеске совамс ды эрямс)[16];
  • «Арсинек, эряви леенть вакска чиемс сестэ, бути толось эйзэнзэ сы…» (Арсинек, эряви леенть вакска чиемс сестэ, сындеряй толось эйзэнзэ…)[17].
  1. Валпельксэнь кандомасо. Истят ильведевксткак вастневить уликс газетань страницатнесэ. Саемга:
  • кедьенк-сост (эряволь кедьен-ксост, кедьен-ксо-ст, -кс суффикс, конась кандомасо а явови)[18];
  • содавик-сэкс (эряволь содави-ксэ-кс, -кс суффикс, конась кандомасо а явови)[19];
  • лезк-сэнть (эряволь лезксэ-нть, -кс суффикс, конась кандомасо а явови);
  • …поэтэсь А. Громыхин (эряволь А. Громыхин)[20];
  • лауреа-токс (эряволь лауре-атокс).
  1. Башка асатыкстнэ-ильведевкстнэ:
  • валрисметнень эсь ютковаст сюлмавомасо. Саемга: …методической пособиянть ды брошюранть, конась карми максомо…(эряволь конат кармить максомо…)[21];
  • кой-кона валтнэнь а видестэ сёрмадомасо. Саемга, ламоксть васневи тевдеема валось д гайтень уликс марто (эряволь тевтеема).

Монь койсэ, весе неть варштавкстнэ кармить лездамо газетанть парочинзэ теемстэ. Арсян, сёрмадыцятне мель явить газетань стилистиканть лувонзо лангс. Истя жо синтаксисэнь лувтнеяк а эрявить стувтнемс.

[1] Девятова М. Музыкантось – Покш Березник велестэ.

[2] Девятова М. Теке жо статьясонть.

[3] Промксонтень сыть 7 академикть (автортомо).

[4] Росгосстрахонтень макссь 27 иеть (автортомо).

[5]  Корчеганов В. Новгородонь сёрмадейтне ды «Эрзянь правдась» теевсть паро оякс.

[6] Ковалева Т. Надежда Петровна Кеняйкинанень – юбилеензэ тешкстыцянтень – паронь арсезь.

[7] Еремина Ю. Квартират – урозтнэнень.

[8] Еремина Ю. Важодицявтомотненень лезды отяжелень центрась.

[9] Зиновьев П. Зярдо тевесь вечкеви…

[10] Моторкин М. Мордовиянть сюпавчизэ – ведесь.

[11] Еремкина Ю. Квартират – урозтнэнень.

[12] Аксенова Т. Журналисттнэ Мордовиядонть кадовсть покш мельспаросо.

[13] Ледстизь героенть лемензэ (автортомо).

[14] Чевте седей, шожда ойме (автортомо).

[15] Маторкина Т. Эскишехтрстэ – изнявкс марто.

[16] Еремкина Ю. Квартират – урозтнэнень.

[17] Росгосстрахонтень макссь 27 иеть (автортомо).

[18] Аксенова Т. Этнической туризманть виевгавтомга.

[19] Девятова М. Музыкантось – Покш Березник велестэ.

[20] Моторкина Т. Од сёрмадыцянь семинар.

[21] Юдина В. Кортасть сыця кочкамотнеде.

 

Оставить комментарий